Na defensa do noso. As mulleres nas loitas polos MVMC.

“Acórdome coma se fora hoxe. Estabamos na cociña e os veciños convencéronme para que subira ó monte. Había moitas mulleres,polo que sei foron as que máis se enfrontaron á Garda Civil.” [1]

Testemuño dunha das veciñas partícipes na defensa do Monte Braña da Gatiñeira. Parroquia de Eiron, Mazaricos, 1963.

O venres día 10 ás 20h faremos un encontro sobre o papel das mulleres na defensa dos Montes Veciñais en Man común durante o franquismo e no postfranquismo. Esta sesión enmárcase dentro de #MontesUtópicos. Son unha serie de encontros online nos cales tratamos múltiples cuestións, sempre centradas nas diversas formas de facer/pensar/sentir… os comúns. Poñemos interese en como establecer narrativas en torno a eles e como comunicalos de xeito proactivo. Nesta ocasión falaremos sobre a acción das mulleres rurais na reapropiación dos Montes Veciñais en Man común e nas loitas agrarias dende os 60s ata a actualidade.

[2]

 [3]

A conversa irá da man de Araceli Freire, investigadora do Departamento de Historia Contemporánea e de América da USC. As súas liñas de traballo xiran en torno á historia agraria, a política forestal e o franquismo. Entre as súas publicacións destaca “En defensa de lo suyo. Propiedad forestal y conflictividad social durante el franquismo: los montes vecinales de Cerceda (A Coruña)”. Tamén “O monte é noso. Conflitividade social no medio rural galego durante o Franquismo. O papel das mulleres na defensa dos montes veciñais en man común”, polo cal recibiu o premio Xohana Torres de ensaio no ano 2011.

Continuamos nesta xuntanza coa liña de traballo marcada en Comúns Feministas, dentro do Lar de Investigación Comunal do montenoso. A través desta iniciativa sumámonos ás olladas feministas arredor da realidade dos Montes Veciñais en Man Común e outros espazos do mancomún, cuxa xestión hai moito de patriarcal de de heteronormativo. A nosa principal motivación é entender os comúns máis aló dos estatutos, das actas, da taberna e procurar espazos para eles, na teima de visibilizar as súas presenzas [4].

Convidámoste comuneirx, investigadorx, activista ou curiosx a entrar neste diálogo que se está a tecer neste pad: https://saramaganta.info:9001/p/montenoso49. Agardámoste o venres 10 de xaneiro as 20:00h. Para participar teste que unir a mumble [Datos de acceso abaixo]. Estaremos minutos antes para facer probas de audio. A ferramenta mumble http://mumble.sourceforge.net é un chat de voz tipo skype ou o hangout de google pero é software libre. Tes que instalalo configuralo seguindo o asistente. Importante! Lembra que cando configures o teu Audio hai unha tecla que é a que che permite activar o micro. Tes que mantela pulsada para falar.

—————————————

[1] Citado por P. BERGANTIÑOS en A Nosa Terra nº 819, 26 de febreiro de 1998

[2]Imaxe. Fonte: Araceli Freire Cedeira: “Social unrest in rural Galicia during the Franco Regime.The case of common lands (1939-1975)” PDF completo.

[3]Imaxe. Araceli Freire Cedeira. Capa do libro: “O monte é noso. Conflitividade social no medio rural galego durante o Franquismo. O papel das mulleres na defensa dos montes veciñais en man común”. 

[4] Feministeamos [Somos múltiples entre o eco-  e o transfeminismo… outras identificámonos coma ecoxéneros…] e imos falar dende aquí, por ser un lugar estratéxico que nos serve para traballar, un marco ideolóxico, político, pragmático, afectivo, sexual, estratéxico onde nos situamos…

—————————————

Mini Manual de configuración de Mumble:
ABRE MUMBLE:
Vai a Servidor- Conectar
Agregas novo servidor e escribes:
Etiqueta: mancomun
Enderezo: mumble.saramaganta.info
Porto: 64738
Nome: o teu nome/nick
estamos na sala: mancomún